ພໍຮອດເດືອນສາມເພັງ ຂອງທຸກໆປີ ຊາວເມືອໄຊພູທອງ ແຂວງ​ສະ​ຫວັນ​ນະ​ເຂດ ໄດ້ພ້ອມພຽງກັນຈັດງານ ນະມັດສະການພຣະທາດໂຜ່ນຂຶ້ນຢ່າງຄຶກຄື້ນ, ເຊິ່ງປີ 2024 ນີ້ ກໍ່ໄດ້ມີການຄົບງັນຕາມປະເພນີແຕ່ວັນທີ 17 ຈົນເຖິງວັນທີ 24 ກຸມພານີ້, ພິທີເປີດງານນະມັດສະການພຣະທາດໂຜ່ນ ເມືອງໄຊພູທອງ ຈັດຂຶ້ນຢ່າງເປັນທາການ ໃນຕອນບ່າຍວັນທີ 20 ກຸມພາ 2024 ໂດຍຕິດພັນກັບງານເປີດປີທ່ອງທ່ຽວລາວ ຢູ່ເມືອງຊພູທອງ ແຂວງສະຫວັນະເຂດ, ເປັນກຽດເຂົ້າຮ່ວມເປັນປະທານໃນງານ ໂດຍທ່ານ ບຸນໂຈມ ອຸບົນປະເສີດ ເຈົ້າແຂວງສະຫວັນະເຂດ, ທ່ານນາງ ຫຼິງທອງ ແສງຕາວັນ ​ຮອງ​ເຈົ້າ​ແຂວງ ທັງເປັນປະທານຄະນະກຳມະການຈັດງານເປີດປີທ່ອງທ່ຽວລາວ 2024 ແຂວງສະຫວັນະເຂດ, ທ່ານ ນາງ ດາວວອນ ໄຊສຸລຽນ ເຈົ້າເມືອງໄຊພູທອງ, ມີການນໍາຂັ້ນແຂວງ, ຂັ້ນເມືອງ, ນັກທຸລະກິດຜູ້ປະກອບການ, ຄະນະກໍາມະການຮັບຜິດຊອບວຽການທ່ອງທ່ຽວ, ຕະຫຼອດຮອດພໍ່ແມ່ພີ່ນ້ອງທັງພາຍໃນ ແລະ ຕ່າງປະເທດ ເຂົ້າຮ່ວມ. ພ້ອມນັ້ນ, ກໍມີທ່ານເຈົ້າເມືອງຊານຸມານ ແຂວງອຳນາດຈະເລີນ ຣາຊະອານາຈັກໄທ ເຂົ້່າຮ່ວມນຳ.

ທ່ານ ພົມມາ ສົງວິໄລ ຮອງເຈົ້າເມືອງໄຊພູທອງ ຮອງປະທານຈັດງານ ໄດ້ກ່າວລາຍງານວ່າ: ເມືອງໄຊພູທອງ ໄດ້ຫ້າງຫາກະກຽມຈັດງານບຸນນະມັດສະການພຣະທາດໂຜ່ນ ຕິດພັນກັບການເປີດປີທ່ອງທ່ຽວຢູ່ເມືອງ, ມີການກະກຽມກິດຈະກຳຕ່າງໆເຊັ່ນ: ກິດຈະກຳສົ່ງເສີມກິລາ-ສິລະປະວັນນະຄະດີ, ພ້ອມນັ້ນ ກໍ່​ໄດ້ມີການປະກວດນັກຮ້ອງສຽງດີ, ໝໍລຳສຽງໃສ ຈາກບັນດາເມືອງອ້ອມຂ້າງແຂວງ, ໃນງານບຸນຍັງຈັດໃຫ້ມີການປະກວດນາງສາວນ້ຳຕານຫວານຫອມ ຈາກ 8 ກຸ່ມບ້ານຂອງເມືອງໄຊພູທອງ, ນອກນັ້ນກໍ່ໄດ້ເຊີນເອົາຜະລິດຕະພັນ ແລະສິນຄ້າໂອດອບ ຈາກກຸ່ມການຜະລິດພາຍໃນເມືອງ ແລະບັນດາເມືອງອ້ອມຂ້າງແຂວງ ເຂົ້າຮ່ວມທັງໝົດ 20 ຮ້ານ, ມີຮ້ານວາງສະແດງສິນຄ້າຈາກພາກສ່ວນທຸລະກິດຜູ້ປະກອບການ ເຂົ້າຮ່ວມ 230 ຮ້ານ, ເຊິ່ງເປັນການສົ່ງເສີມສ້າງໂອກາດໃຫ້ປະຊາຊົນທີ່ມາກາບໄຫວ້ ນະມັດສະການພຣະທາດໂຜ່ນ ໄດ້ມາທ່ອງທ່ຽວ ແລະແລກປ່ຽນຊື້ຂາຍສິນຄ້າຕ່າງໆອີກດ້ວຍ.

     ໃນພິທີ, ທ່ານ ນາງ ດາວວອນ ໄຊສຸລຽນ ເຈົ້າເມືອງໄຊພູທອງ ກໍ່ໄດ້ກ່າວເປີດງານບຸນນະມັດສະການພຣະທາດໂຜ່ນ ຕິດພັນກັບການເປີດປີທ່ອງທ່ຽວເມືອງໄຊພູທອງ, ເຊິ່ງກໍໄດ້ຍົກໃຫ້ເຫັນວ່າ: ໃນປີ 2024 ນີ້ ພັກ-ລັດຖະບານ ໄດ້ກຳນົດເປັນປີທ່ອງທ່ຽວລາວ ເປັນຄັ້ງທີ 4 ນັບແຕ່ປີ 1999 ເປັນຕົ້ນມາ, ເມືອງໄຊພູທອງ ກໍ່ເປັນເມືອງໜຶ່ງ ທີ່ຍາມໃດກໍ່ຖືເອົາວຽກງານສົ່ງເສີມການທ່ອງທ່ຽວເປັນການກະຕຸກຊຸກຍູ້ ໃຫ້ແກ່ການຂະຫຍາຍຕົວທາງດ້ານເສດຖະກິດຢ່າງຕໍ່ເນື່ອງ ແລະກໍ່ມີແຫຼ່ງທ່ອງທ່ຽວຕ່າງໆ ເຊັ່ນ: ແຫຼ່ງທ່ອທ່ຽວທາງດ້ານວັດທະນະທຳພ​ຣະທາດໂຜ່ນ, ແຫຼ່ງທ່ອງທ່ຽວທາງດ້ານປະຫວັດສາດຜາສາດເຮືອນຫີນ ແລະແຫຼ່ງທ່ອງທ່ຽວທາງດ້ານທຳມະຊາດອື່ນໆ.

     ໃນການເຂົ້າຮ່ວມເປັນປະທານການເປີດງານ ທ່ານ ບຸນໂຈມ ອຸບົນປະເສີດ ເຈົ້າແຂວງສະຫວັນະເຂດ ກໍ່ໄດ້ໃຫ້ກຽດລັ່ນຄ້ອງ 9 ບາດ ເປີດງານນະມັດສະການພຣະທາດໂຜ່ນ ຕິດພັນກັບການເປີດປີທ່ອງທ່ຽວ ຢູ່ເມືອງໄຊພູທອງ ແຂວງສະຫວັນນະເຂດ ຢ່າງເປັນທາງການ. ພ້ອມ​ທັງ​ຊົມ​ການ​ສະ​ແດງ​ສິ​ລະ​ປະ-ວັນ​ນະ​ຄະ​ດີ ຈາກ​ນ້ອງ​ນັກ​ຮຽນ​ພາຍ​ໃນ​ເມືອງ ແລະ​ເມືອງ​ອ້ອມ​ຂ້າງ​ຕື່ມ​ອີກ.

ຈາກນັ້ນ ກໍ່​​ໄດ້​ປະ​ຕິ​ບັດຕາມຮີດຄອງປະເພນີ ໂດຍໄດ້ມີການແຫ່ຜາສາດເຜິ້ງ ອ້ອມຮອບພຣະທາດໂຜ່ນ 3 ຮອບ ແລ້ວນຳໄປວາງຖວາຍໄວ້ທີ່ພ​ຣະທາດ, ພ​ຣະທາດໂຜ່ນ ແມ່ນປູນີຍະສະຖານທີ່ເກົ່າແກ່ ແລະສັກສິດ ທີ່ຊາວພຸດ​ທະຊະນິກະຊົນທັງຫຼາຍ ໃຫ້ຄວາມເຫຼື້ອມໃສສັດທາ, ເປັນທີ່​ສັກກາລະບູຊາ, ທັງພາຍໃນ ແລະ ຕ່າງປະເທດ, ເຊິ່ງການມາກາບໄຫວ້ນະມັດສະການພຣະທາດໂຜ່ນ ກໍ່ແມ່ນໜຶ່ງໃນ 3 ໄຫວ້ ທີ່ມາທ່ຽວແຂວງສະຫວັນະເຂດ ໃນປີທ່ອງທ່ຽວລາວ 2024 ນີ້ ຕ້ອງໄດ້ແວ່ກາບໄຫວ້ ພຣະທາດອີງຮັງ, ໄຫວ້ພະທາດໂຜ່ນ ແລະໄຫວ້ຫໍໄຕປີດົກ.