ໃນວັນທີ 20 ກຸມພາ 2024 ນີ້, ແຂວງສະຫວັນນະເຂດ ໄດ້ຈັດພິທີຖະແຫຼງຂ່າວການກຽມຄວາມພ້ອມເປີດປີທ່ອງທ່ຽວລາວ 2024 ທີ່ສະລາແຄມຂອງ ນະຄອນໄກສອນພົມວິຫານ ໂດຍໃຫ້ກຽດເຂົ້າຮ່ວມຂອງທ່ານ ບຸນໂຈມ ອຸບົນປະເສີດ ເຈົ້າແຂວງສະຫວັນນະເຂດ , ມີຮອງເລຂາພັກແຂວງ, ຮອງເຈົ້າແຂວງ, ປະທານ-ຮອງປະທານຈັດງານປີທ່ອງທ່ຽວລາວ2024 , ມີຄະນະປະຈຳພັກແຂວງ,ກໍາມະການພັກແຂວງ, ມີຕາງໜ້າກົງສຸນໃຫຍ່ແຫ່ງ ສ.ສ ຫວຽດນາມ, ຕາງໜ້າກົງສຸນໃຫຍ່ແຫ່ງຣາຊະອານາຈັກໄທ, ທ່ານເຈົ້ານະຄອນໄກສອນພົມວິຫານ, ເຈົ້າເມືອງ14 ເມືອງ, ຫົວໜ້າພະແນກການອ້ອມຂ້າງແຂວງ, ນັກທຸລະກິດຜູ້ປະກອບການທັງພາຍໃນ ແລະຕ່າງປະເທດເຂົ້າຮ່ວມ.

ໃນໂອກາດນີ້, ທ່ານ ນາງຫຼິງທອງ ແສງຕາວັນ ຮອງເຈົ້າແຂວງສະຫວັນນະເຂດ ທັງເປັນປະທານຈັດງານປີທ່ອງທ່ຽວລາວ 2024 ທີ່ແຂວງສະຫວັນນະເຂດ ກໍ່ໄດ້ລາຍງານການກະກຽມຄວາມພ້ອມເປີດປີທ່ອງທ່ຽວລາວ2024 ຕິດພັນກັບງານເທສະການສະຫວັນສຸກສັນຫັນສາ ການເປີດງານຄັ້ງນີ້ ແມ່ນກຽມຄວາມພ້ອມຮອບດ້ານ ໂດຍສະເພາະແມ່ນຖະໜົນຫົນທາງ, ເຮືອນພັກໂຮງແຮມ, ຮ້ານອາຫານເຄື່ອງດື່ມ ຕະຫຼອດຮອດການຈັດສັນປະດັບປະດາແສງສີສຽງອື່ນໆ ແມ່ນກຽມຄວາມພ້ອມທຸກຢ່າງ ເພື່ອຄວາມສວຍງາມ. ມາຮອດປັດຈຸບັນຕາມວົງວຽນຕ່າງໆກໍ່ມີການປະດັບປະດາ ຢ່າງງົດງາມ ຕາມເສັ້ນທາງກໍ່ຂຶ້ນປ້າຍໂຄສະນາເຊິ່ງສະແດງໃຫ້ເຫັນເຖິງແຫຼ່ງທ່ອງທ່ຽວຂອງແຂວງ ພ້ອມກັນນັ້ນ ໃນ 14 ເມືອງ 1 ນະຄອນ ກໍ່ລ້ວນແຕ່ກຽມຄວາມພ້ອມທຸກຢ່າງ ເພື່ອກໍານົດເອົາກ້ອນກໍາລັງ ແລະນໍາເອົາເອກະລັກຂອງເມືອງ ແຕ່ລະເມືອງມາເອກອ້າງ ໃຫ້ແກ່ຊຸມຊົນສັງຄົມ ຮູ້ເຖິງແຫຼ່ງທ່ອງທ່ຽວ ຂອງເມືອງໃຜລາວ ຈະເປັນຮູບຈໍາລອງວັດວາອາມຣາມ ທີ່ສັກສິດເປັນບ່ອນສັກກະລະບູຊາ ເຊັ່ນ: ຮູບພາບຈໍາລອງພຣະທາດອີງຮັງ, ທາດໂຜ່ນ, ຫໍໄຕປີດົກ ແລະແຫຼ່ງອື່ນໆ, ມື້ເປີດງານທ່ອງທ່ຽວ ທີ່ຕິດພັນກັບກິດຈະກໍາສະຫວັນສຸກສັນຫັນສາ ແມ່ນເລີ່ມແຕ່ວັນທີ 10-17 ມີນາ 2024 ລວມ 8 ມື້ 7 ຄືນ ໃນງານມີກິດຈະກໍາຫຼາກຫຼາຍ ທີ່ນໍາເອົາມາສະແດງໃຫ້ພໍ່ແມ່ພີ່ນ້ອງໄປທ່ຽວໄປຊົມໄດ້ ໃນແຕ່ລະວັນ, ສ່ວນໃນວັນທີ 10 ມີນາ 2024 ເປັນມື້ເປີດຢ່າງເປັນທາງການ ໄດ້ນໍາເອົາລາຍການສະແດງຂັບລໍາ 4 ຈັ່ງຫວະ, ບົດເພງ ຈາກສິລະປິນ ຈໍານວນ 8 ທ່ານ, ຍິງ4 ທ່ານ ແລະ ກ້ອນກໍາລັງມາສະແດງ, ກ້ອນພາເຫຼດ ຈາກພາກສ່ວນຂອງແຂວງ ມີ 10 ກ້ອນ. ຂະບວນກ້ອນພາເຫຼດ ຂອງ 14 ເມືອງ 01 ນະຄອນ.

ຈາກນັ້ນ, ທ່ານ ບຸນໂຈມ ອຸບົນປະເສີດ ກໍ່ໄດ້ໃຫ້ກຽດຂຶ້ນຖະແຫຼງຂ່າວການຈັດປີທ່ອງທ່ຽວລາວ 2024 ຕິດພັນກັບງານເທສະການສະຫວັນສຸກສັນຫັນສາ ເຊິ່ງແຂວງສະຫວັນນະເຂດແມ່ນ ໄດ້ປະຕິບັດຕາມນະໂຍບາຍພັດທະນາ ແລະສົ່ງເສີມການທ່ອງທ່ຽວທາງດ້ານວັດທະນະທໍາ, ປະຫວັດສາດ, ທໍາມະຊາດ ແລະກະສິກໍາ ເພື່ອເປັນທ່າແຮງດຶງດູດນັກທ່ອງທ່ຽວ ເຂົ້າມາທ່ຽວຊົມແຂວງສະຫວັນນະເຂດໃຫ້ຫຼາຍຂຶ້ນ, ສ້າງວຽກ​ເຮັດ​ງານ​ທຳ​ໃຫ້​ແກ່​ສັງຄົມ, ຊຸກຍູ້ການຜະ​ລິດ​ກະ​ສິ​ກຳ, ຫັດ​ຖະ​ກຳ​, ທຸລະກິດປິ່ນອ້ອມ, ການ​ກະ​ຈາຍ​ລາຍ​ໄດ້​ເຂົ້າຊຸມຊົນ ແລະພັດທະນາເສດຖະກິດ-ສັງຄົມຂອງແຂວງໃຫ້ມີການພັດທະນາຢ່າງບໍ່ຢຸດຢັ້ງ. ສຳລັບປີ 2024 ນີ້ແມ່ນເປັນຄັ້ງທີ 4 ພາຍໃຕ້ຄໍາໂຄງທີ່ວ່າ: ທ່ຽວສະຫວັນ ບ້ານເຮົາເດີເຮີຍ ໂດຍກໍານົດເອົາໂລໂກ້ການທ່ອງທ່ຽວທາດອີງຮັງ - ຕິບເຂົ້າ - ປີ້ງໄກ່ - ຊີ້ນສະຫວັນ - ມີຮູບນັກທ່ອງທ່ຽວ ເປັນສັນຍາລັກໂດດເດັ່ນທາງດ້ານແຫຼ່ງທ່ອງທ່ຽວ ແລະ ອາຫານທີ່ເປັນເອກະລັກສະເພາະຂອງແຂວງ.

     ໂອກາດນີ້, ທ່ານ ທ່ານ ບຸນໂຈມ ອຸບົນປະເສີດ ຍັງໄດ້ແຈ້ງໃຫ້ຮູ້ຕື່ມອີກວ່າ: ສະຖານທີ່ຈັດງານແມ່ນກໍານົດເອົາຂອບເຂດເທສະບານຕົວເມືອງເກົ່າ, ນະຄອນໄກສອນ ພົມວິຫານ ເຊິ່ງປີນີ້ແມ່ນຈະຈັດຂື້ນຍ່າງຍິ່ງໃຫຍ່ກວ່າຄັ້ງຜ່ານໆມາ. ພາຍໃຕ້ຄໍາໂຄງທີ່ວ່າ: ທ່ຽວສະຫວັນ ໄຫວ້ພຣະທາດອີງຮັງ ວັນທັງພຣະທາດໂຜ່ນ ມົນຂັງ ຫໍພຣະໄຕປີດົກ ມໍລະດົກຕົວເມືອງເກົ່າປະຫວັດສາດ ດົງນາຕາດ ທໍາມະຊາດສົດໃສ ເຂດເສດຖະກິດພິເສດ ອຸດສາຫະກໍາ ກ້າວໄກ ປີ້ງໄກ່ເຊໂນ ແດນໝາກໂມຫວານ ເຂົ້າສະຫວັນ ຫອມຫວນ ມ່ວນສຽງລໍາ ສີ່ທໍານອງ ບໍ່ຄໍາ-ທອງ ຊັບປະເສີດ ແຫຼ່ງກໍາເນີດໄດໂນເສົາ ຖິ່ນລໍາເນົາ ວິຣະບູລຸດແຫ່ງຊາດລາວ. ພ້ອມນີ້, ຍັງຮຽກຮ້ອງມາຍັງຜູ້ທີ່ຈະມາທ່ຽວງານແມ່ນໃຫ້ໄດ້ໄປກາບໄຫວ້ 3 ໄຫວ້, 4 ເບິ່ງ ແລະ 5 ຊົມ ຄື: ກາບໄຫວ້ ພຣະທາດອີງຮັງ, ກາບໄຫວ້ ພຣະທາດໂຜ່ນ ແລະກາບໄຫວ້ ຫໍພຣະໄຕປີດົກ. 4 ເບິ່ງ ປະກອບມີ: ທ່ຽວເບິ່ງຫໍພິພິທະພັນແຂວງ, ເບິ່ງ ຫໍພິພິທະພັນໄດໂນເສົາ, ເບິ່ງຫໍພິພິທະພັນຮ່ວມສໍາພັນສູ້ຮົບລາວ-ຫວຽດນາມ, ເບິ່ງມໍລະດົກສະຖານໜອງເຮືອທອງ. 5 ຊົມ ມີ: ທ່ຽວຊົ ຕົວເມືອງເກົ່າປະຫວັດສາດ-ໜອງຫຼົ່ມປ່າສະຫງວນດົງນາຕາດ ນະຄອນໄກສອນ, ຊົມ ລີງ-ປາຝາ-ຝາຍສຸຍ ຈໍາພອນ, ຊົມໂອ່ງ-ມັ່ງ, ນົກຍາງຂາວ, ແຫຼ່ງຂຸດຄົ້ນກະດູກໄດໂນເສົາ ຊົນນະບູລີ, ຊົມໂນນຫີນດ້າງ, ໂພນຊ້າງສານ, ສີສະເກດສວນຕານ, ຜາສາດຫີນ ໄຊພຸູທອງ, ຊົມພຣະທາດນາງລາວ-ພຣະເຈົ້າອົງແສນ-ຫີນ 3 ເສົ້າ-ນໍ້າເກົ້າແຄວ ວິລະບູລີ.

     ພ້ອມດຽວກັນນີ້, ທ່ານເຈົ້າແຂວງ ກໍ່ຍັງເຊີນຊວນພີ່ນ້ອງຊາວແຂວງສະຫວັນນະເຂດ ຈົ່ງຮ່ວມມືສາມັກຄີເປັນປຶກແຜ່ນຮ່ວມກັນເປັນເຈົ້າພາບທີ່ດີ ເພື່ອຕ້ອນຮັບນັກທ່ອງທ່ຽວພາຍໃນ ແລະ ຕ່າງປະເທດ ເຂົ້າມາທ່ອງທ່ຽວພາຍໃນແຂວງ ໃຫ້ມີຄວາມພາກພູມໃຈ ຕໍ່ນໍ້າໃຈຊາວແຂວງສະຫວັນນະເຂດ ມາທ່ຽວແລ້ວຢາກມາທ່ຽວອີກຄັ້ງໃໝ່. ໃນໂອກາດດັ່ງກ່າວ, ບັນດາຄະນະອະນຸກໍາມະການຈັດງານ ກໍ່ໄດ້ລາຍງານການກະກຽມຄວາມພ້ອມໃນແຕ່ລະດ້ານຕື່ມອີກ./.