ໃນ​ຕອນ​ບ່າຍ​ວັນ​ທີ 13 ກຸມ​ພາ 2024 ເມືອງ​ໄຊ​ບູ​ລີ ຮ່ວມ​ກັບ​ພາກ​ເອ​ກະ​ຊົນ ໄດ້​ຮ່ວມ​ກັນ​ຈັດ​ງານ​ຕະ​ຫຼາດ​ນັດ​ວາງ​ສະ​ແດງ​ສິນ​ຄ້າ ຕິດ​ພັນ​ກັບ​ງານ​ປະ​ກວດ​ຫຸ່ນ​ເຟືອງ​ຍັກ ຄັ້ງ​ທີ 2 ທີ່​ໄດ້​ຈັດ​ຂຶ້ນ​ທີ່​ຕະ​ຫຼາດ​ເມືອງ​ໄຊ​ບູ​ລີ, ໂດຍ​ການ​ເປັນ​ກຽດ​ເຂົ້າ​ຮ່ວມ​ເປັນ​ປະ​ທານ​ຂອງ​ທ່ານ ປອ. ວັນ​ແສງ ແກ້ວ​ບຸນ​ພັນ ຫົວ​ໜ້າ​ພະ​ແນກ​ອຸດ​ສາ​ຫະ​ກຳ-ການ​ຄ້າ​ແຂວງ, ທ່ານ ພູ​ເງິນ ຈັນ​ທະສອນ ຮອງ​ເຈົ້າ​ເມືອງ​ໄຊ​ບູ​ລີ, ພ້ອມ​ດ້ວຍ​ການ​ນຳ​ເມືອງ ແລະ​ບັນ​ດາ​ຫ້ອງ​ການ​ອ້ອມ​ຂ້າງ​ເມືອງ, ມວນ​ຊົນ​ຊາວ​ເມືອງ​ໄຊ​ບູ​ລີ​ເຂົ້າ​ຮ່ວມ.

ໃນ​ພິ​ທີ​ໄດ້​ມີ​ການ​ໄດ້​ມີ​ການ​ແນະ​ນຳ​ລະ​ບຽບ ແລະ​ເງື່ອນ​ໄຂ​ໃນ​ການ​ປະ​ກວດ​ຫຸ່ນ​ເຟືອງ​ຍັກ ເພື່ອ​ໃຫ້​ຜູ້​ເຂົ້າ​ຮ່ວມ​ໄດ້​ຮັບ​ຮູ້ ໂດຍ​ສະ​ເພາະ ໂຄງ​ສ້າງ​ຕ້ອງ​ມີ​ຄວາມ​ແຂງ​ແຮງ, ຂະ​ໜາດ​ຂອງ​ຫຸ່ນ ຄວາມ​ສູງ 2,50 ແມັດ, ກວ້າງ 2 ແມັດ, ບາວ 2,50 ແມັດ, ການ​ຕົກ​ແຕ່ງ​ຖານ ໃຫ້​ມີ​ຄວາມ​ສວຍ​ງາມ ແລະ​ເໝາະ​ສົມ, ນອກນັ້ນ ເຈົ້າ​ຂອງ​ຫຸ່ນ​ເຟືອງ ຕ້ອງ​ສາ​ມາດ​ແນະ​ນຳ​ທີ່​ມາ​ຂອງ​ຫຸ່ນ​ໃຫ້​ໄດ້ ເພື່ອ​ໃຫ້​ຜູ້​ຊົມ​ໄດ້​ຮັບ​ຮູ້​ຢ່າງ​ຈະ​ແຈ້ງ. ການ​ແຂ່ງ​ຂັນ​ປະ​ກວດ​ຫຸ່ນ​ເຟືອງ​ຍັກ​ຄັ້ງ​ນີ້ ໄດ້​ມີ 8 ບ້ານ​ທີ່​ສົ່ງ​ຫຸ່ນ​ເຟືອງ​ເຂົ້າ​ແຂ່ງ​ຂັນ ເຊິ່ງ​ປະ​ກອບ​ດ້ວຍ: ບ້ານ​ນາ​ເຮືອງ ໄດ້​ສ້າງ​ຫຸ່ນ​ເຟືອງ​ຂ້ອງ​ໃຫຍ່ ພ້ອມ​ດ້ວຍ​ອົງ​ປະ​ກອບ​ເຊັ່ນ: ພ​ຣະ​ທາດ 2 ອົງ, ຂຽດ​ເຫຼືອງ​ໃຫຍ່, ເຫັດ​ລະ​ໂງກ 3 ດອກ, ກະ​ຕ່າ​ທີ່​ເປັນ​ເຄື່ອງ​ໃຊ້, ບ້ານ​ຫມາກ​ນາວ​ເໜືອ ໄດ້​ສ້າງ​ຫຸ່ນ​ເຟືອງ​ແຂ້​ໃຫຍ່, ບ້ານ​ແກ້ງ​ແຮດ ໄດ້​ສ້າງ​ຫຸ່ນ​ເຟືອງ ແຮດ​ໃຫຍ່, ບ້ານ​ແກ້ງ​ກະ​ເບົາ ໄດ້​ສ້າງ​ຫຸ່ນ​ເຟືອງ​ປາ​ເພ້ຍ​ໃຫຍ່, ບ້ານ​ກ້າງ​ປາ ໄດ້​ສ້າງ​ຫຸ່ນ​ເຟືອງ​ປາ​ຄໍ່​ໃຫຍ່, ບ້ານ​ຄຳ​ໂນນ​ສູງ ໄດ້​ສ້າງ​ຫຸ່ນ​ເຟືອງ​ກົບ​ຄຳ​ໃຫຍ່ ແລະ​ບ້ານຕົ້ນ​ແຫນ ໄດ້​ສ້າງ​ຫຸ່ນ​ເຟືອງ​ງົວ​ໃຫຍ່

        ຈາກນັ້ນ, ທ່ານ ​ພູ​ເງິນ ​​ຈັນ​ທະ​ສອນ ໄດ້ມີ​ຄຳ​ເຫັນ​ກ່າວ​ເປີດ​ງານ​ຄັ້ງ​ນີ້​ວ່າ: ງານປະກວດຫຸ່ນເຟືອງຍັກປີ 2024 ເຊິ່ງເປັນປີທີ 02 ແລ້ວທີ່ທາງເມືອງໄດ້ຈັດຂຶ້ນ ເຊິ່ງ​ປີນີ້ ກໍ່​ໄດ້​ຈັດ​ຂຶ້ນໃນ​ລະ​ຫວ່າງວັນ​ທີ 12-14 ກຸມ​ພາ 2024 ຢູ່​ທີ່​ເດີ່ນ​ຕະ​ຫຼາດ​ຂອງ​ເມືອງ (ຕະ​ຫຼາດ ADB) ໂດຍ​ຈັດ​ໃຫ້​ມີການວາງສະແດງສິນຄ້າປະເພດຕ່າງໆ, ທັງ​ນີ້ກໍ່ເພື່ອເປັນ​ການກະຕຸ້ນເສດຖະກິດ ຂອງປະຊາຊົນ ໂດຍ​ສະ​ເພາະ ຜະລິດຕະພັນກະສິກໍາ, ຫັດຖະກຳ, ສິນຄ້າໂອດອບຂອງເມືອງ, ເຄື່ອງອຸປະໂພກ, ບໍລິໂພກ, ໃຫ້ປະຊາຊົນພາຍເມືອງ ກໍຄືແຂວງສະຫວັນນະເຂດ ໄດ້ຮັບຮູ້ຢ່າງກວ້າງຂວາງ, ພ້ອມ​ທັງເປັນການສ້າງຈຸດຈໍາໜ່າຍສິນຄ້າ ແລະໃຫ້ຜູ້ຄ້າຂາຍ ຮູ້ລະບຽບກົດໝາຍ ທັງເປັນການປະກອບສວ່ນເຮັດໃຫ້ເມືອງ ມີຖານລາຍຮັບທີ່ໝັ້ນຄົງ. ໃນການເປີດງານປະກວດຫຸ່ນເມືອງຍັກຄັ້ງນີ້, ຂໍສະແດງຄວາມຂອບໃຈ ບັນດາທ່ານ ການນຳຫ້ອງການທີ່ກ່ຽວຂ້ອງ ໃນ​ການ​ປະ​ກອບ​ສ່ວນ​ໃນ​ງານ​ຄັ້ງ​ນີ້, ຂໍຂອບໃຈ ນຳ​ເຈົ້າ​ຂອງ​ຕະ​ຫຼາດ ທີ່​ໄດ້​ໃຫ້​ການ​ອູ້ມ​ຊູ​ດ້ານ​ງົບ​ປະ​ມານ ໃນ​ການ​ຈັດ​ງານ​ຄັ້ງ​ນີ້​ນຳ​ພ້ອມ.

        ສຳ​ລັບ​ຜົນ​ຂອງ​ການ​ປະ​ກວດ​ຫຸ່ນ​ເຟືອງ​ຍັກຂອງ​ເມືອງ​ໄຊ​ບູລີ ໃນ​ປີ 2024 ນີ້, ຜູ້​ຊະ​ນະ​ເລີດ ໄດ້​ແກ້​ຫຸ່ນ​ເຟືອງ​ຂ້ອງ​ໃຫຍ່ ຈາກ​ບ້ານ​ນາ​ເຮືອງ ໄດ້​ຮັບ​ລາງວັນ​ເງິນ​ສົດ 5 ລ້ານ​ກີບ, ອັນ​ດັບ 2 ໄດ້​ແກ່ ຫຸ່ນ​ເຟືອງ​ແຮດ​ໃຫຍ່ ຈາກ​ບ້ານ​ແກ້ງ​ແຮດ ໄດ້​ຮັບ​ລາງວັນ​ເງິນ​ສົດ 3 ລ້ານ​ກີບ, ອັນ​ດັບ 3 ໄດ້​ແກ່ ຫຸ່ນ​ເຟືອງ​ແຂ້​ໃຫຍ່ ບ້ານ​ໝາກ​ນາວ​ເໜືອ ໄດ້​ຮັບ​ລາງວັນ​ເງິນ​ສົດ 1 ລ້ານ​ກີບ./.